Cynnig Eitem o Ddodrefn : 01286 674 155 Rydym bob amser yn chwilio am ddodrefn o ansawdd da y gellir eu hailddefnyddio. Ni fydd tâl am eu casglu.    Rydym yn ddiolchgar i bob un o’n cymwynaswyr sydd wedi rhoddi eitemau, ac sy’n parhau i gynnig eitemau i’n hachos elusennol. Rydym yn dibynnu ar haelioni pobl i allu parhau i ddarparu gwasanaeth ar gyfer pobl sydd angen eitemau am brisiau y gallant eu fforddio.

Defnyddir y cyllid a ddaw o werthu’r eitemau a roddwyd ar gyfer datblygu ymhellach y prosiectau cymdeithasol, addysgiadol ac ym myd gwaith a weithredir gan Antur Waunfawr er budd oedolion gydag anabledd dysgu. Mae eich rhoddion o fudd i’r gymuned a’r amgylchedd….

A yw’r eitemau dodrefn yr hoffech eu cyflwyno mewn cyflwr digon da i allu eu hailddefnyddio?

Dim ond y dodrefn y buasem yn hapus i’w cael yn ein cartrefi ein hunain a werthwn ymlaen. Rhaid i’r holl eitemau fod mewn cyflwr da neu, os ydynt yn eitemau pren, y gallwn eu hatgyweirio yn ein Gweithdy Gwaith Coed.

Pan ddaw ein Tîm Casglu i’ch cartref, maent yn cadw’r hawl i wrthod eitemau nad ydynt yn addas i’w hailwerthu.

Amcanwn i ymateb i’ch galwad yn ystod yr un wythnos ag y derbyniasom eich cais. Gwelwch isod fanylion ein trefn gasglu. Oherwydd natur ein casgliadau, nid ydym yn gwarantu casglu ond rhwng oriau 9 y bore a 2.30 y pnawn ar ddiwrnod penodol.  

Daw ein rhoddion oddi wrth bobl sydd ag eitemau nad ydynt eu heisiau ac sy’n dymuno naill ai helpu y rhai sy’n llai ffodus na hwy neu maent yn poeni bod eitemau (y gellid eu defnyddio) yn cael eu taflu’n ddiangen i’r ffrwd wastraff am ddim rheswm ond eu bod yn anffasiynol.

Cesglir y rhoddion gan Antur Waunfawr gan ddefnyddio ein faniau bocs ein hunain. Disgwyliwn bod y dodrefn yn cael eu storio a’u cadw mewn cyflwr da hyd y dyddiad casglu gan fod y mwyafrif o’r eitemau a gesglir yn cael eu trosglwyddo i’r derbynnydd nesaf heb eu hadnewyddu. Ni fyddwn yn casglu dodrefn sydd wedi eu gadael y tu allan. 

Os oes gennych ddodrefn o ansawdd da ac nid ydych eu hangen mwyach, edrychwch ar y rhestr isod i weld os yw eich dodrefn chi yn addas ar gyfer Antur Waunfawr. 

Trefn Casglu: Llun: Casglu’n lleol yng Nghaernarfon, Llanberis, Llanrug, Waunfawr a’r ardaloedd cyfagos. Mawrth: Casglu ym Mangor a’r ardaloedd o amgylch. Mercher: Casglu’n lleol (gweler uchod) Iau : Ynys Môn Gwener: ardaloedd Pen Llŷn, Porthmadog a Ffestiniog.