Safle Bryn Pistyll : 01286 650 721

Lleolwyd Antur Waunfawr ar un o lecynnau prydferthaf Dyffryn Gwyrfai yn y pentref o’r un enw, yng nghol Cefn Du, Moel Eilian, Y Mynyddfawr a’r Allt Coed Mawr. Dewiswyd hen gwmwd Bryn Pistyll fel y man cychwyn ac un o brosiectau cyntaf yr Antur oedd adnewyddu Siop Bryn Pistyll, a oedd wedi cau ers blynyddoedd, ac adfeilion y bythynnod o’i chwmpas. Heddiw mae drws Siop Bryn Pistyll ar agor i fusnes ac yn gwerthu cynnyrch yr Antur. Mae’r murddunnod unwaith eto’n gartrefi a chodwyd swyddfeydd a chaffi deniadol ar adfeilion Tyn Gerddi. Adnewyddwyd y Tŷ Capel, gan gadw ei awyrgylch a’i gymeriad, yn adeilad amlbwrpas sy’n gartref i swyddfa’r Cynllun Cartrefu ac Amgueddfa John Evans. Trowyd saith acer o dir corsiog yn safle garddio cymdeithasol a therapiwtig gan gynnwys barc natur ac gerddi hardd sy’n dod â phleser i bobl yr ardal ac i ymwelwyr.  Gan rhoi cyfle i bobl sydd ag anableddau dysgu gymryd rhan mewn tyfu amrywiaeth o blanhigion a llysiau mae'r prosiect hwn yn defnyddio gwaith garddio fel modd o wella sgiliau, iechyd a safon byw yr unigolion sy'n cymryd rhan.

Mae Bryn Pistyll yn cynnwys sawl atyniad poblogaidd:

• Mae’r cynefinoedd amrywiol yn y Parc Natur yn denu pob math o fywyd gwyllt, llwybrau dirgel, coedlannau, gwaith celf anghyffredin a golygfeydd gwych o fynyddoedd Eryri.

• Yn y Tŷ Capel, ceir arddangosfeydd am gymeriadau lleol, fel yr anturiaethwr John Evans o Waunfawr.

• Mae’r gerddi yn cynnwys casgliad hynod ddiddorol a lliwgar o goed a blodau ac mae planhigion gwyllt sydd wedi eu tyfu ar y safle ar gael i’w prynu o’r feithrinfa.

• Mae pob math o grefftau, cynnyrch lleol a danteithion eraill ar werth yn Siop Bryn Pistyll.

• Bydd gweithgareddau celf a chrefft yr Antur yn cael eu hymestyn yn ddiweddarach eleni pan gaiff y Sgubor Grefftau ei hagor ym Mryn Pistyll.

• Ar ôl treulio amser yn crwydro trwy’r parc ac yn mwynhau’r holl sydd gan Antur Waunfawr i’w gynnig, beth well na phaned a thamaid i’w fwyta yng nghaffi Blas y Waun?